கொரோனா தொற்று பரவி கொரோனா மரணங்களின் எண்ணிக்கை அதிகரித்துள்ளமைக்கு முழுமையாகப் பொறுப்பு கூற வேண்டியவர்கள் ஜோசப் ஸ்டாலின், சஜித் மற்றும் அனுர கொத்தணி என நெடுஞ்சாலைகள் அமைச்சர் ஜோன்ஸ்டன் பெர்னாண்டோ தெரிவித்துள்ளார்.
கடந்த காலங்களில் எதிர்க்கட்சித் தலைவர் சஜித் பிரேமதாச, ஜே.வி.பி.யின் தலைவர் அனுரகுமார திசாநாயக்க ஆகியோரின் ஆசீர்வாதத்துடன், ஜோசப் ஸ்டாலின் ,மஹிந்த ஜயசிங்க மற்றும் ஆசிரியர்கள் ஆகியோர் சுகாதார ஆலோசனைகளையும் மீறி வீதிகளில் இறங்கி போராட்டங்களை முன்னெடுத்தமையால் கொரோனா தொற்று பரவக் கூடிய சூழ்நிலையை ஏற்படுத்திக் கொடுத்ததாகவும் கொரோனா தொற்று பரவ கொரோனா கொத்தணி உருவாக்கிய அரசியல் கட்சிகளின் தலைவர்கள் தற்போது நாட்டை முடக்குமாறு கூறுவது நகைப்புக்குரிய விடயமாகும் என அவர் சுட்டிக்காட்டியுள்ளார்.
கொழும்பு மாவட்டத்தில் 200,000 பேருக்குத் தடுப்பூசி செலுத்த வில்லை என எதிர்க்கட்சிகள் கூறினாலும், அரசாங்கம் பொறுப்புள்ள அரசாக செயல்பட்டு அந்த மக்களுக்குத் தடுப்பூசி செலுத்த நடமாடும் தடுப்பூசி திட்டத்தை மேற்கொண்டுள்ளதாக அவர் தெரிவித்துள்ளார்.
எதிர்க்கட்சி ஆரம்பத்திலிருந்தே கொரோனா தடுப்பூசி செலுத் தும் திட்டத்தை முறியடித்ததாகவும் தடுப்பூசி தரமற்றது என்றும் இந்த நாட்டு மக்களைப் பரிசோதனை எலிகளாகப் பயன்படுத்த அரசாங்கம் நடவடிக்கை எடுத்ததாகவும் எதிர்க்கட்சி தலைவர் சஜித் தெரிவித்துள்ளதாகவும் அவர் மேலும் தெரிவித்துள்ளார்.
தடுப்பூசியை தான் இறுதியாகவே பெறுவேன் எனக் கூறிய சஜித், எவரும் அறியாமல் தடுப்பூசியை இரகசியமாகச் செலுத்திக் கொண்டதாகவும் அவர் மேலும் தெரிவித்துள்ளார்.
நாட்டை முடக்கும் போது நாட்டை திறவுங்கள் என்றும் நாட்டை திறந்த பின்னர் நாட்டை முடக்குமாறு கோஷங்களை எழுப்பும் இதுபோன்ற பொறுப்பற்ற முறையில் செயற்படும் எதிர்க்கட்சி உலகில் எந்த நாட்டிலும் இல்லை என ஜோன்ஸ்டன் பெர்னாண்டோ தெரிவித்துள்ளார்.
Post a Comment